पुस १४, २०७४ – नेपाली कांग्रेसका सभापति एवं प्रधानमन्त्री शेरबहादुर देउवाले चुनावी समीक्षा गर्न छिट्टै केन्द्रीय समिति बैठक बोलाउने बताउनुभएको छ ।

प्रदेशसभातर्फ समानुपातिक सदस्यको नाम टुङगो लगाउन आज बसेको केन्द्रीय कार्यसम्पादन समित बैठकलाई सम्बोधन गर्दै उहाँले प्रतिनिधि र प्रदेशसभा निर्वाचनबारे छिटै बैठक बोलाएर गम्भीर छलफल गर्ने आश्वासन दिनुभएको थियो ।

बैठकमा नेताहरुले निर्वाचनमा पार्टीले भोगेको लजास्पद पराजयको बिषय उठाउंदै सभापति देउवाको ध्यानाकर्षण गराएका थिए । बैठक पछि नेता बालकृष्ण खाँणले भन्नुभयो बैठकमा चुनावी समीक्षा बारे सामान्य छलफल भयो, थप छलफलका लागि सभापतिले छिटै केन्द्रीय समितिको बैठक बोलाउंछु भन्नुभएको छ ।

खाँणले कांग्रेसमा सभापतिले राजीनामा दिने प्रचलन नरहेकाले सो विषयले बैठकमा कुनै अर्थ नलाग्ने टिप्पणी गर्नुभयो ।

बैठकले राष्ट्रिय सभा निर्वाचन अध्यादेश राष्ट्रपतिबाट प्रमाणीकरण भईसकेकाले चाँडो राष्ट्रिय सभा निर्वाचन गराउन सरकारको ध्यानाकर्षण गराएको नेता खाँणले बताउनुभयो ।

स्रोत ः इकान्तिपूर