पश्चिमाञ्चल गौरव पुरस्कार महावीर पुनलाई, राष्ट्रिय आविष्कार केन्द्रलाई एक लाख

राष्ट्र न्यूज सम्वाददाता
पौष १, २०७५
Mahabir

पोखरा, मंसिर २९ । गैह्रापाटनस्थित पश्चिमाञ्चल माविले राष्ट्रिय आविष्कार केन्द्रलाई एकलाख रुपैयाँ आर्थिक सहयोग गरेको छ ।

त्यस्तै विद्यालयले हरेक दुई–दुईवर्षमा प्रदान गर्ने पश्चिमाञ्चल गौरव पुरस्कार केन्द्रका अभियन्ता महावीर पुनलाई प्रदान गरेको छ । आविष्कार केन्द्र स्थापनामा थोरै भएपनि योगदान दिनका लागि सहयोग गरेको विद्यालयले बताएको छ ।

विज्ञान र प्रविधिमा विशेष योगदान दिएको भन्दै आविष्कार केन्द्रका अभियन्ता पुनलाई १ लाख २५ (२५ हजार पुस्कार राशी र एकलाख सहयोग) हजार रुपैयाँको संयुक्त चेक हस्तान्तरण गरिएको हो ।

विद्यालयको २७ औं वार्षिकोत्सवको अवसर पारेर शनिबार आयोजित कार्यक्रममा गण्डकी प्रदेशकी सांसद मित्रकुमारी सुवेदी, पश्चिमाञ्चल फाउन्डेसनका अध्यक्ष गेहेन्द्रेश्वर कोइराला, पुरस्कार छनोट समितिका संयोजक प्राडा विश्वकल्याण पराजुली, प्राचार्य ताराबहादुर घिमिरे लगायतले पुरस्कार र सहयोग प्रदान गरेका थिए ।

पुनले राष्ट्रिय आविष्कार केन्द्र स्थापना गर्नका लागि व्यक्तिगत रुपमा जग्गा दिएर आर्थिक सहयोग जुटाउन थालेका थिए । सुचना प्रविधिका अभियन्ता पुन म्यासेसे पुरस्कार विजेता पनि हुन् । दुर्गम गाउँमा सुचना प्रविधि बिस्तारमा उनले विषेश योगदान दिएका थिए ।

पुरस्कार छनोट समिति संयोजक प्राडा विश्वकल्याण पराजुलीले पुनले सुचना प्राविधिका लागि विश्वकै लागि योगदान दिएको बताए । त्यही योगदान स्वरुप ३० जना व्यक्तिमध्येबाट पुन छनोटमा परेको उनले बताए ।

विद्यालयले दुईवर्ष अघि पहिलोपटक यो पुरस्कार विज्ञान क्षेत्रमा अनुसन्धान गरेको भन्दै डा. कपील अधिकारीलाई प्रदान गरेको थियो । विज्ञान र प्रविधिको क्षेत्रमा योगदान दिने व्यक्तिलाई २ वर्षको फरकमा विद्यालयले यो पुरस्कार प्रदान गर्दै आएको छ ।

विद्यालयका प्राचार्य ताराबहादुर घिमिरेले पुनको योगदानबाट सबैले सिको गर्नुपर्ने बताए ।
‘दुर्गम गाउँले पुनबाट धेरै लाभ पाएका छन् । यो सिकाई अरुका लागि पनि हुनुपर्छ,’ घिमिरेले भने । प्रदेशसभा सदस्य सुवेदीले पुनबाट राष्ट्रले नै पुनबाट लाभ लिनुपर्ने बताइन ।

राज्यले पुन जस्ता व्यक्तिबाट धेरै कुरा सिक्नुपर्ने उनले बताइन । पश्चिमाञ्चल फाउन्डेसनका अध्यक्ष कोइरालाले पुनको सिको अरुले पनि गर्न सके राष्ट्रका लागि महत्वपूर्ण योगदान हुने बताए ।

विद्यालयले वार्षिकोत्सवका अवसरमा आयोजित विभिन्न कार्यक्रमका उत्कृष्ट विद्यार्थीलाई सोही अवसरमा पुरस्कृत पनि गरेको थियो ।

विद्यालयले वार्षिकोत्सवका अवसरमा शुक्रबार खुला रक्तदान आयोजना गर्दा ६० जनाले रक्तदान गरेका थिए । विद्यालयमा १२ कक्षासम्म अध्यापन हुन्छ ।

Related News

सम्बन्धित समाचार

Archives

Archives