पोखरा, १३ मंसीर । नेशनल प्याव्सन कास्कीले आयोजना गरेको अन्तरविद्यालय स्तरीय नेपाली वक्तृत्वकला प्रतियोगितामा रत्नज्योति सेकेन्डरी स्कुलकी छात्रा अमृता अधिकारी प्रथम भएकी छन् ।

प्रतियोगितामा राइजिङ स्टार एकेडेमीकी छात्रा खुशी विक द्धितीय, पोखरा क्याम्ब्रीज इङ्लीस स्कुलकी छात्रा सन्जना मगर तृतीय र अक्सफोर्ड स्कुलकी छात्रा रोशनी शर्मा सान्त्वना भएको कार्यक्रम संयोजक राजु कायस्थले जानकारी दिए ।

शैक्षिक क्षेत्रमा कोभिड १९ को प्रभाव विषयमा राखिएको वक्तृत्वकला प्रतियोगिताको निर्णायकमा प्रा.डा.लक्ष्मीशरण अधिकारी, डा.कपिल अधिकारी र दिनेश अर्याल रहेका थिए ।

प्रतियोगितामा नेशनल प्याव्सन कास्कीमा आवद्ध विद्यालयका विद्यार्थीको सहभागिता रहेको थियो । प्रतियोगितामा विजयी विद्यार्थीलाई मायाको चिनो र ट्रफी प्रदान गरिएको थियो ।

कोभिड १९ का कारण लामो समयसम्म विद्यालय बन्द भएको अवस्थामा विद्यार्थीलाई प्रत्यक्ष सहभागिता गराई विद्यार्थीको मनोबल उकास्ने हेतुले प्रत्यक्ष प्रतियोगिताको आयोजना गरिएको सह क्रियाकलाप प्रमुख राजु केसीले जानकारी दिए ।

कार्यक्रममा बोल्दै प्रमुख अतिथि नेशनल प्याव्सनका केन्द्रीय वरिष्ठ उपाध्यक्ष ज्ञानेन्द्रमोहन भट्टराईले विद्यार्थीलाई प्रत्यक्ष सहभागिता गराएर कोभिड १९ को बारेमा जानकारी दिने गरी गरेको यो प्रतियोगिता नेपालकै उदाहरणीय भएको बताए ।

नेशनल प्याव्सन गण्डकी प्रदेशका अध्यक्ष याम खड्काले भाषाको विकास गर्न वक्तृत्वकला कोषेढुड्डा सावित हुने बताए ।

निर्णायक प्रा.डा. कपिल अधिकारीले विद्यार्थीको क्षमता अभिवृद्धिमा एन प्याव्सन कास्की अग्रणी भूमिकामा रहेको बताए ।

निर्णाणक डा.कपिल अधिकारीले समयसान्दर्भिक विषयको उठान गरेर विद्यार्थीलाई यस विषयमा सचेत गराउने काम गरेकोमा धन्यवाद व्यक्त गरे ।

निर्णायक दिनेश अर्यालले यो कोभिड १९ का कारण घर भित्रै रहेका विद्यार्थीलाई प्रत्यक्ष सहभागिता गराएर कार्यक्रम गरेको यो पहिलो भएको बताए ।

नेशनल प्याव्सन कास्कीका द्धितीय उपाध्यक्ष केशवशरण पौडेलले प्रत्यक्ष रुपमा सञ्चालन भएको प्रतियोगिताले सुसुप्त रहेको शैक्षिक जगतमा उर्जा थप्ने काम गरेको बताए ।

नेशनल प्याव्सन कास्कीका अध्यक्ष हेमन्त अधिकारीको अध्यक्षतामा भएको कार्यक्रमको सञ्चालन सदस्य शिवराज पौडेलले गरेका थिए ।