पोखरा, ६ भदौ । उद्योग, पर्यटन, वाणिज्य तथा आपूर्ति मन्त्री मणिभद्र शर्मा पोखराको चिसाखोला वेद विद्याश्रम पुग्नुभएको छ ।

विद्याश्रमको अवलोकनका लागि पुग्नुभएका मन्त्री शर्मालाई विद्याश्रमका पदाधिकारी एवं सदस्यहरुले स्वागत गर्नुभएको थियो ।

त्यसक्रममा उहाँले विद्याश्रमको विकासका लागि के गर्न सकिन्छ त्यस बारे अध्ययन गर्ने बताउनुभयो । विद्याश्रमलाई धार्मिक पर्यटकीय क्षेत्रका रुपमा विकास गर्न सकिने उहाँको भनाइ छ ।

कार्यक्रममा विद्याश्रमका सल्लाहकार लक्ष्मीराज शर्मा गौतम, मन्दिर निर्माण समितिका संयोजक सुरेशकुमार श्रेष्ठ, कोषाध्यक्ष शिव प्रसाद पराजुली, प्रधानाध्यापक श्रीराम तिमिल्सिना र पत्रकार सुदीपराज ढुङ्गानाले बोल्नुभएको थियो ।

एक सय ५० रोपनी क्षेत्रफलमा फैलिएको विद्याश्रममा कक्षा ६ देखि १२ सम्म देशभरका एक सय २७ जना विद्यार्थीले संस्कृत शिक्षा लिइरहेका छन् ।

पछिल्लो समय मन्त्री शर्माले धार्मिक तथा पर्यटकीय क्षेत्रको निरीक्षण तथा अवलोकनलाई निरन्तरता दिइरहनु भएको छ ।