पोखरा,५ फागुन । सोंथर बेँसी टारी बजार मेला – २०७९ सकिएको छ ।

फागुन १ देखि ३ गतेसम्म चलेको मेला करिब पाँच हजार दर्शकले अवलोकन गरेको बताइएको छ ।  मेलामा सहभागिताका पोखरा र लमजुङका विभिन्न स्थानबाट समेत दर्शकहरु पुगेका थिए ।

‘उत्साहजनक रुपमा मेला सफल भएको ठानेका छौं, आयोजक सोंथर बेँसी विकास समितिका अध्यक्ष ओम प्रकाश गुरुङले भन्नुभयो – सबैको सहयोगका कारण मेला सफल भयो, सबैप्रति आभार व्यक्त गर्दछौं ।’

‘सोंथर बेँसी तथा त्यस क्षेत्रको प्रवद्र्वन, कृषि र पर्यटन’ भन्ने मूल नाराका साथ मेला आयोजना गरिएको थियो ।

उद्घाटन समारोहमा विभिन्न स्थानबाट सांस्कृतिक झाँकीहरु प्रदर्शन गरिएको थियो । मेलामा विशेष गरी सोंथर बेँसी लगायत त्यस आसपास क्षेत्रमा उत्पादित कृषि वस्तु तथा पशुचौपायहरुको प्रदर्शनी एवम् बिक्री भएको थियो ।

त्यस्तै खेलकुद तर्फ वडास्तरीय भलिबल प्रतियोगिता, खुल्ला छेलो÷ठेलो प्रतियोगिता, रसी तान्ने प्रतियोगिता, सांस्कृतिक तर्फ खुल्ला सामुहिक नृत्य प्रतियोगिता, खुल्ला दोहोरी प्रतियोगिता, खुल्ला भजन प्रतियोगिता साथै स्थानीय युवा क्लबहरुको ठेटार नाच एवम् चर्चित कलाकारहरुको समेत प्रस्तुती रहेको थियो ।

मेलाको समापन अवसरसँगै विभिन्न प्रतियोगिताका विजेता समूहलाई पुरस्कार वितरण गरिएको थियो । मेलाको लागि मुख्य प्रायोजन मादी गाउँपालिका कार्यालयले गरेको हो । ३५ वर्ष अघि निकै प्रख्यात रहेको सोंथर बेँसी मेलालाई थप परिस्कृत गर्दै लैजाने योजना सहित यसपटक मेला आयोजना गरिएको हो ।

मादी गाउँपालिकाको वडा नं ८ मा पर्ने नागिधार र पाखुरीकोट गाउँ, वडा नं १० मा पर्ने भाचोक गाउँको संगम स्थल हो सोेँथर बेँसी । सोंथर बेँसीमा हाल फार्महाउस एवम् केहि होमस्टे समेत सन्चालनमा रहेका छन् । फार्महाउसमा बसेर नजिकै वार्दी खोलामा पौडी खेल्दै दुवाली थुनेर असला माछा मार्दै आनन्द लिन सकिने छ । त्यस्तै नजिकै टारी खेतहरुमा गोठहरु समेत रहेकाले गोठमा खिर खाने जस्ता अनुभव लिइ आनन्द समेत लिन सकिनेछ ।