पोखरा, ३१ वैशाख । स्वाबलम्वन जीवन पद्वती केन्द्र पोखराको आयोजनामा पहुचयुक्त संरचना र संचार सम्वन्धी अभिमुखीकरण र पहुचयुक्त परीक्षण कार्यक्रम गरिएको छ ।

सामाजिक विकास कार्यालय कास्कीको सहयोगमा वैशाख ३० र ३१ गते कार्यक्रम गरिएको हो । कार्यक्रममा विभिन्न मन्त्रालय र स्थानीय सरकारमा कार्यरत इन्जिनियर, जनप्रतिनिधि, अपाङ्गता क्षेत्रका अगुवा गरी ४१ जनाको सहभागिता रहेको थियो ।

सबैका लागि पहुचयुक्त भौतिक संरचना आवश्यक रहेको बारे जानकारी दिने उद्देश्यले कार्यक्रम गरिएको हो । कार्यक्रममा अपाङ्गता के हो ?, यसका प्रकार, पहुचयुक्तता भनेको के हो ? र त्यसको आवश्यकता बारे छलफल गरिएको थियो । कार्यक्रमका क्रममा पहुचयुक्त मापदण्ड वमोजिम फिल्ड परीक्षण अभ्यास पनि गरिएको थियो ।

पहुचयुक्त संरचना अपाङ्गताका लागि मात्रै नभएर ज्येष्ठ नागरिक, गर्भवती महिला र विरामी लगायतलाई पनि आवश्यक रहेको कार्यक्रममा औल्याइएको छ ।

कार्यक्रममा इन्जिनियर टेक राना र राष्ट्रिय अपाङ्ग महासंघ गण्डकी प्रदेशका अध्यक्ष खोमराज शर्माले सहजिकरण गर्नुभएको थियो ।

कार्यक्रममा बोल्दै सामाजिक विकास कार्यालय कास्कीका प्रमुख इन्द्र बहादुर थापाले राज्य र प्राविधिक दुवैलाई पहुचयुक्त संरचनाको आवश्यकता बारे सूसुचित बनाउनुपर्नेमा जोड दिनुभयो । उहाँले कतिपय सरकारी संरचना अपाङ्गता मैत्री नभएको र कतिपयमा अझै सुधार्न आवश्यक रहेको उल्लेख गर्नुभयो ।

स्वाबलम्वन जीवन पद्वती केन्द्र पोखराका अध्यक्ष हेम गुरुङको अध्यक्षतामा भएको कार्यक्रममा महासचिव अन्जना केसी, दिपक भण्डारी र सुवाष भट्टराईले बोल्नुभएको थियो ।