पोखरा, २५ भदौं । कास्की जिल्ला जिम्न्याष्टिक्स संघको प्रथम जिल्ला अधिवेशनले सोमबहादुर साईको अध्यक्षतामा नयाँ कार्यसमिति चयन गरेको छ ।

संघको उपाध्यक्षमा लक्ष्मण आचार्य, महिला उपाध्यक्ष एन शोभा गुरुङ, सचिवमा गौतम चौधरी, कोषाध्यक्षमा दिपेन्द्र अधिकारी, सहकोषाध्यक्षमा अर्जुन गुरुङ, तथा सदस्यहरुमा मीनबहादुर थापा, सुवर्णराज पन्त, पविन बास्तोला, दिपेश राना, रामबहादुर क्षेत्री, मुना लामिछाने र बालकुमारी गुरुङ रहनुभएको छ ।

कार्यक्रममा निर्वाचन समितिका संयोजक नेपाल जिम्न्याष्टिक्स संघका केन्द्रीय सदस्य योगेन्द्र बहादुर गुरुङ, जिल्ला खेलकुद विकास समिति कास्कीका सदस्य तिलकबहादुर अधिकारी, निर्वाचन समति सदस्य केशवशरण पौडेल, राजु कायस्थ र राजु केसीले सपथ खुवाएका थिए ।

कास्की जिल्ला जिम्याष्टिक्स संघका सचिव प्रकाशचन्द्र सापकोटाले प्रस्तुत गरेको वार्षिक प्रगति प्रतिवेदन र कोषाध्यक्ष थमन बहादुर थापाले प्रस्तुत गरेको आर्थिक प्रगति प्रतिवेदन सभाले सर्वसम्मत् पास गरेको थियो ।

यस अघि कार्यक्रमको उद्घाटन गर्दै प्रमुख अतिथि प्रदेश खेलकुद परिषद् गण्डकी प्रदेशका उपाध्यक्ष ध्वजकुमार गुरुङले अब हुने दशौ राष्ट्रिय खेलकुद महोत्वसलाई लक्षित गरेर खेलाडी उत्पादन गर्न सुझाव दिनुभयो ।

‘कार्यक्रममा पश्चिमाञ्चल खेलकुद विकास समितिका कार्यालय प्रमुख लक्ष्मण योगीले संघले गरेका गतिविधि उदाहरणीय भएको बताउनुभयो ।

जिल्ला खेलकुद विकास समिति कास्कीका सदस्य तिलकबहादुर अधिकारीले संघका हरेक गतिविधिमा अभिभावकत्व ग्रहण गर्ने उल्लेख गर्नुभयो ।

नेपाल जिम्न्याष्टिक्स संघका केन्द्रीय सदस्य योगेन्द्र बहादुर गुरुङले नयाँ कार्यसमितिलाई अझै उत्कृट कार्य गरेर अगाडि बढ्न सुझाव दिनुभयो ।

कास्की जिल्ला जिम्न्याष्टिक्स संघका सल्लाहकार केशवशरण पौडेलले विद्यालय जिम्न्याष्टिक्स संघमा रहेर काम गरेको अनुभव सुनाउदै खेलाडी उत्पादन गर्न कास्कीमा रहेका निजी तथा सामुदायिक विद्यालयमा जिम्न्याष्टिक्स सिकाउनु पर्ने उल्लेख गर्नुभयो ।

कास्की जिल्ला जिम्न्याष्टिक संघका कार्यवहाक अध्यक्ष राजु कायस्थको अध्यक्षतामा भएको कार्यक्रममा सहसचिव राजु केसीले स्वागत र सचिव प्रकाशचन्द्र सापकोटाले कार्यक्रम सञ्चालन गर्नुभएको थियो ।