पोखरा, २२ वैशाख । एमाले नेता स्वं रविन्द्र अधिकारीको ५५ औं जन्मजयन्तीको अबसरमा पोखरामा शनिबार रक्तदान र परिसंवाद कार्यक्रम गरिएको छ ।

उहाँको स्मृतिमा स्थापना भएको रबिन्द्र अधिकारी स्मृति प्रतिष्ठानले दुई छुट्टाछुट्टै कार्यक्रम गरी जन्मजयन्ती मनाएको हो ।

रक्तदान कार्यक्रममा ४० युनिट रगत संकलन भएको प्रतिष्ठानले जनाएको छ। रक्तदानको प्रतिष्ठानकी अध्यक्ष बिद्या भट्टराईले उद्घाटन गर्नुभएको थियो ।

त्यसैगरी “स्मृतिमा रबिन्द्र अधिकारी“ बिषयक परिसंवाद कार्यक्रममा बोल्ने बक्ताहरूले बिकासका कुशल योजनाकार र जनताको सच्चा जनप्रतिनिधिको रूपमा स्मरण गर्नुभयो ।

कार्यक्रमका प्रमुख बक्ता गण्डकी प्रदेश नीति तथा योजना आयोगका उपाध्यक्ष डा.श्रीकान्त खतिवडाले राष्ट्रिय राजनीतिमा मात्रै नभएर देश बिकासको योजनाकारका रुपमा चित्रण गर्नुभयो ।

प्रतिष्ठानका सदस्य कालिदास तिमिल्सिनाले आफ्ना कुरा स्थापित गर्न सक्ने क्षमतावान नेता भएको उल्लेख गर्नुभयो ।

प्रतिष्ठानका अर्का सदस्य राजेन्द्रमणि लामिछानेले अधिकारी कुशल नेता मात्रै नभएर बिकासको असली अभियन्ता र साझेदार भएको बताउनुभयो ।

कार्यक्रममा नेकपा एमाले कास्कीका अध्यक्ष बैन बहादुर अधिकारी ,नेपाली काँग्रेस कास्कीका सभापति किशोरदत्त बराल , गण्डकी प्रदेश नीति तथा योजना आयोगका पूर्व सदस्य डा. शान्ता खत्री ,पृथ्वीनारायण क्याम्पसका पूर्ब क्याम्पस प्रमुख गेहेन्द्रेश्वर कोइरालाले स्वं अधिकारीको योगदान बारे चर्चा गर्नुभएको थियो ।