पोखरा, ६ असोज। प्रसूति व्यथा च्यापेर सिकिस्त एक जना गर्भवतीको बाग्लुङबाट नेपाली सेनाको हेलिकप्टरमार्फत उद्धार गरिएको छ । तमानखोला गाउँपालिका–१ बोंगादोभानकी २० वर्षीया सुनिला श्रीपालीको आइतबार बिहान बुर्तिबाङबाट हवाई उद्धार गरिएको हो ।
व्यथा च्यापेपछि उहाँ शनिबार राति ९ बजे बुर्तिबाङ प्राथमिक स्वास्थ्य केन्द्रमा भर्ना हुनु भएको थियो । आइतबार बिहान साढे ३ बजेदेखि उच्च रक्तचापले मुर्छा परेपछि श्रीपालीलाई काठमाडौं पठाइएको बुर्तिबाङ प्राथमिक स्वास्थ्य केन्द्र प्रमुख डा. नविन्द्र ढकालले जानकारी दिनुभयो । उहाँलाई थापाथलीस्थित परोपकार प्रसूति गृह तथा स्त्रीरोग अस्पताल लगिएको छ ।
घुमफिरको सिजन भएकाले यो समयमा निजी कम्पनीको हेलिकप्टर उद्धारका लागि पाउन मुस्किल हुन्छ । निजी कम्पनीको हेलिकप्टर नपाइएपछि गण्डकी प्रदेश सरकारका स्वास्थ्यमन्त्री कृष्णप्रसाद पाठकले गृह र रक्षामन्त्रीलाई सम्पर्क गर्नुभएको थियो । ‘मैले बिहानै ४ बजे खबर पाएको थिएँ । त्यसपछि मन्त्रालयको टिमले निजी हेलिकप्टर कम्पनीलाई सोध्यो । सबै रिजर्भ रैछन्,’ उहाँले भन्नुभयो, ‘गृह र रक्षामन्त्रीले सहयोग गर्नुभयो । त्यसपछि नेपाली सेनाको हेलिकप्टर बिहान बुर्तिबाङ गयो ।’
गर्भवती श्रीपालीको स्वास्थ्य रेखदेखमा बुर्तिबाङ प्राथमिक स्वास्थ्य केन्द्रका प्रमुख डा. नविन्द्र ढकाल, रचना सुवेदीलगायत स्वास्थ्यकर्मीको समूह खटेको थियो ।