पोखरा । गण्डकी प्रदेशकी कृषि, भूमि व्यवस्था तथा सहकारी मन्त्री पद्मा जिसी श्रेष्ठले मुलुकको समृद्धिमा जलस्रोतको महत्वपूर्ण भूमिका रहेको बताउनु भएको छ ।
नवलपुरको कावासोती स्थित कावासोती खानेपानी तथा सरसफाई उपभोक्ता संस्थाको २४औँ वार्षिक साधारण सभामा बोल्दै उहाँले उपलब्ध जलस्रोतलाई पुर्ण रुपमा उपयोग गर्न सके देश विकासमा टेवा पुग्ने बताउनु भएको हो ।
‘नेपाल जलस्रोतको धनी देश, यसको उपयोगिता बृहत छ । यसलाई पूर्ण रुपमा उपयोग गर्न सके सुखी नेपाली समृद्ध देश निर्माणकोे साझा संकल्पलाई थप अघि बढाउन टेवा पुग्ने छ’– उहाँले भन्नुभयो ।
कावासोती क्षेत्रका जनताले विगतमा भोग्नुपरेको खानेपानीको समस्या स्मरण गर्दै मन्त्री श्रेष्ठले संस्थाकै अग्रसरताको परिणाम स्वरुप अहिले सहज स्थिती आएको बताउनुभयो । कावासोती खानेपानी संस्थाले स्थापनाकालदेखि नै आफुलाई अब्बल सावित गर्दै आइरहेको उल्लेख गर्दै उहाँले यसलाई समयानुसार उपभोक्ताको हकहितमा लाग्न आग्रह गर्नुभयो ।
‘कावासोती क्षेत्रको विगत स्मरण गर्दा खानेपानीको हाहाकार थियो । घण्टौँ लगाएर कुवा धाएर पानी लिएर आउनुपथ्र्यो । अहिले त्यो अवस्था छैन । घरघरमा धारा जोडिएका छन् । यो संस्थाकै अब्बल कार्यको परिणाम हो।’ उहाँले भन्नुभयो, ‘उपलब्ध स्रोत साधन एवं प्रविधिलाई थप सुदृढ बनाउदै उपभोक्ताको सर्वोपरी हितलाई केन्द्रबिन्दुमा राख्दै अघि बढ्न शुभकामना ब्यक्त गर्दछु ।’