पोखरा, २४ चैत । गण्डकी प्रदेशका उर्जा, जलश्रोत तथा खानेपानी मन्त्री हरि शरण आचार्यले गण्डकी प्रदेशलाई उज्यालो प्रदेश घोषणा गरिने बताउनु भएको छ ।

‘अब गण्डकी प्रदेशमा लालटिन र टुकी बल्ने छैन उहाँले भन्नुभयो, बैकल्पिक उर्जाको उपयोग गरेर भएपनि उज्यालो प्रदेश घोषणा गर्ने छौं ।’ यसै आर्थिक वर्षभित्र उज्यालो प्रदेश घोषणा गरिने उहाँको भनाइ छ ।

मन्त्रालयका उपलब्धि बारे जानकारी दिन विहिबार पोखरामा आयोजित पत्रकार सम्मेलनमा उहाँले त्यस्तो बनाउनु भएको हो ।

हालसम्म नवीकरणीय उर्जा मार्फत् ६ दशमलव ४६ प्रतिशत र राष्ट्रिय विद्युत प्रशारण लाइन मार्फत् ९२ दशमलव ७९ प्रतिशत गरी ९९ दशमलव २५ प्रतिशत घरधुरीमा विद्युतको पहुँच पुगेको मन्त्री आचार्यले जानकारी दिनुभयो ।

उहाँले विहिबार नै गण्डकी प्रदेश सभाले सिंचाई ऐन पारित गरेकाले अब छिट्टै कार्यन्वयन हुने र खानेपानी ऐन पनि छिट्टै पारित हुने जानकारी दिनुभयो ।

मन्त्री आचार्यले जनतासँग मन्त्री, समस्या समाधानमा मन्त्रालय अभियानले जनताको आवश्यकता अनुसार तत्काल गर्नुपर्ने काम गरिएको बताउनुभयो ।

पत्रकार सम्मेलनमा उहाँले मन्त्रालयको भौतिक र वित्तीय प्रगती सार्वजनिक गर्नुभएको थियो ।