पोखरा, २७ चैत । जलीय जिवको संरक्षण गरी न्यायोचित उपभोग गर्दै भावि सन्ततीको लागि जगेणा गरौं भन्ने मूल नाराका साथ कास्कीका विभिन्न तालहरुमा माछाका भुरा छाडिएको छ ।

जलीय जैविक विविधता संरक्षण गर्ने उद्देश्यले मत्स्य विकास केन्द्र मिर्मी स्याङ्जाले कास्कीका तालतलाउँमा दश हजार माछाका भुरा छाडेको केन्द्र प्रमुख रविन्सन अधिकारीले जानकारी दिनुभयो । उहाँले गण्डकी प्रदेशलाई माछामा आत्मनिर्भर बनाउने लक्ष्य लिइएको उल्लेख गर्नुभयो ।
जलवायु परिवर्तन, तालमा आश्रित जनसमुदायको बढ्दो संख्याले तालमा भएका स्थानीय जातका माछा लोप हुँदै गएकाले माछा उत्पादन बढाउन भुरा छाडिएको हो ।

कास्कीको रुपातालमा पशुपन्छि तथा मत्स्य विकास निर्देशनालय गण्डकी प्रदेशका निर्देशक डा. मन बहादुर पुन र मस्त्य विकास केन्द्र मिर्मीका प्रमुख रविन्सन अधिकारीले स्थानीय तथा अन्य जातका माछाका भुरा छाडेर कार्यक्रम शुभारम्भ गर्नुभएको थियो ।