पोखरा, ११ पागुन । बिरामी सुरक्षा सम्बन्धी पाँचौ मन्त्रीस्तरीय शिखर सम्मेलनमा नेपाली प्रतिनिधि मण्डलको नेतृत्व गर्दै स्वीट्जरल्याण्ड पुग्नु भएका स्वास्थ्य तथा जनसंख्या मन्त्री पदम गिरी र विश्व स्वास्थ्य संगठनका महानिर्देशक डा टेड्रोस अधानोम गेब्रेयस बीच भेटवार्ता भएको छ ।

भेटका क्रममा मन्त्री गिरीले विश्व स्वास्थ्य संगठनले नेपालको स्वास्थ्य क्षेत्रमा पु¥याएको योगदान प्रति धन्यवाद व्यक्त गर्नुभयो । विशेष गरी खोप कार्यक्रम, पोलियो, विभिन्न प्रकोपहरूको नियन्त्रण ,रोकथाम, निवारण र उन्मूलन तथा मातृशिशु स्वास्थ्यमा नेपालका लागि खेलेको भूमिकाको प्रशंसा गर्नुभयो ।

भेटमा २०७२ सालको भूकम्प, हैजा प्रकोप ,कोभिड महामारी नियन्त्रण र कोभिड खोप उपलब्ध गराउन भूमिका खेलेको प्रति धन्यवाद व्यक्त गर्नुभएको थियो ।

विश्व स्वास्थ्य संगठनका समन्वय सेन्टरहरू निर्माण, राष्ट्रिय जनस्वास्थ्य प्रयोगशालाको सुदृढिकरण, स्वास्थ्य सुरक्षा र अन्तराष्ट्रिय स्वास्थ्य नियमनको कार्यान्वनका लागि छलफल भएको मन्त्रीका प्रमुख स्वकीय सचिव लक्ष्मण गिरीले जानकारी दिनुभयो ।