पोखरा, ६ भदौ । गण्डकी प्रदेशका अर्थमन्त्री जीत प्रकाश आले मगर निरीक्षणका लागि बुधबार पोखरा ११ को काँहु पुग्नुभएको छ ।

उहाँसँगै गण्डकी प्रदेश सभा सदस्य सरस्वती गुरुङ पनि त्यहाँ पुग्नुभएको हो।

काँहुको धार्मिक, पर्यटकीय, ऐतिहासिक अवस्था बारे जानकारी लिन मन्त्री आले मगर काँहु पुग्नुभएको हो । उहाँलाई पोखरा ११ का वडाध्यक्ष प्रेम कर्माचार्यसहित सदस्य र विभिन्न स्थानमा स्थानीयहरुले स्वागत गरेका थिए ।

उहाँले काँहु धरहरा, काँहु धरहरासम्म पुग्ने मूल सडक र विभिन्न स्थानको पहिरो, देउराली मन्दिर, न्यासास्थित पानी पँधेरो, शिव मन्दिरको निरीक्षण गर्नुको साथै न्यासाका स्थानीय नागरिकसँग भेटघाट गर्नुभयो ।

न्यासाका नागरिकले विद्युत पोल र खानेपानीको समस्यालाई मुख्य रुपमा ध्यानाकर्षण गराएको वडा सदस्य शुशील बास्तोलाले जानकारी दिनुभयो ।

निरीक्षणपछि मन्त्री आले मगरले प्रदेश सरकारले जनताको आवश्यकता र भावना बुझेको उल्लेख गर्नुभयो । उहाँ जनताका समस्या समाधान गर्न आफू सदैव अग्रसर रहेको बताउनुभयो ।

गण्डकी प्रदेश सभा सदस्य सरस्वती गुरुङले सरकारले जनतालाई नै केन्द्रविन्दुमा राखेर अघि बढ्नुपर्नेमा जोड दिनुभयो ।

पोखरा ११ का वडा अध्यक्ष प्रेम कर्माचार्यले जनताका चाहाना अनुसार काम गर्ने प्रयास गरिरहेको बताउनुभयो ।