पोखरा, १० पुस । नेपाली काँग्रेस कास्कीले प्रहरीले नेपाल विद्यार्थी संघ कास्कीका विद्यार्थी नेतामाथि गरेको धरपकड र लाठिचार्जको निन्दा एवं भत्सर्ना गरेको छ ।

नेपाल सरकारका संस्कृति तथा पर्यटन मन्त्री सुदन किराँतीको गैर जिम्मेवारपूर्ण अभिव्यक्ति विरुद्व नेपाल विद्यार्थी संघ पृथ्वीनारायण क्याम्पसले पुस ९ गते गरेको शान्तिपूर्ण प्रदर्शनमा प्रहरीबाट भएको हस्तक्षेपको निन्दा गरेको हो ।

कास्की काँग्रेसका सभापति किशोरदत्त बरालद्वारा मंगलबार जारी विज्ञप्तिमा प्रहरीको लाठिचार्जबाट नेपाल मगर संघ गण्डकी प्रदेशका अध्यक्ष डेक पुन गम्भिर घाइते भएको घटनाप्रति गम्भिर ध्यानाकर्षण भएको उल्लेख छ ।

जनप्रिय बहुमुखी क्याम्पसका विद्यार्थी नेता समेत पुनको हाल गण्डकी मेडिकल कलेजमा टाउँकोको सल्यक्रिया भई थप उपचारका क्रममा रहनु भएकाले शिघ्र स्वास्थ्यलाभको कामना गर्दछौ विज्ञप्तिमा भनिएको छं । विज्ञप्तिमा घाइते विद्यार्थी नेताको निःशुल्क उपचारका लागि नेपाल सरकारसँग जोडदार माग गरिएको छ ।

साथै घटनाको सत्यतथ्य छानविन गरी दोषी उपर कारवाही गर्न माग गरिएको छ ।